Porsche valinn besti framleiðandinn

Bandarísku neytendasamtökin Consumer Reports (CR) eru engum háð og óhagnaðardrifin. Þau njóta mikils trausts og virðingar fyrir hlutlausar úttektir sínar á markaðsvarningi hvers konar.

Hjá bílaáhugamönnum ríkir jafnan mikil eftirvænting fyrir útkomu úr árlegri rannsókn þeirra á bílamarkaðnum. Nýlega var tilkynnt um hvaða bílar hefðu komið bæði best og verst út að mati Consumer Reports í ár. Niðurstaðan byggir jöfnum höndum á ítarlegum prófunum fagmanna hjá samtökunum sem og vitnisburði frá bíleigendum sjálfum. Í ár hlaut þýski bílaframleiðandinn Porsche, hæstu einkunn. Í öðru og þriðja sæti lentu Genesis og Mazda. Fram kemur að oftar en ekki grundvallist útkoman á heildarmati á að minnsta kosti tveimur bílgerðum hjá viðkomandi framleiðanda og er sigurinn því ekki bundinn við einn bíl sérstaklega.

Gæðamatið og niðurstaðan byggja á fjórum lykilþáttum:

• Akstursprófunum þar sem allir bílarnir eru látnir fara í gegnum 50 mismunandi þrautir í akstri á vegum úti.
• Meðlimir samtakanna gera ítarlegar áreiðanleikaprófanir á 17 skilgreindum álagshlutum hvers bíls.
• Framkvæmd er nákvæm ánægjukönnun á meðal bíleigenda, þar sem m.a. er dregið fram hvort viðkomandi myndi vilja kaupa sama bíl aftur.
• Öryggi bílanna og árekstrarþol er rannsakað sérstaklega og aukastig gefin þegar í ljós kemur að öryggisþættir fara fram úr því sem gefið er upp sem lágmarks staðall fyrir viðkomandi bílgerð af hálfu framleiðanda.